Kito husličkar – Fotowy shooting z dźowku wódneho muža

Holca dźěše domoj a Kito ćehnješe dale. Wón njepytny, zo bě jemu pomocnik Pana Dietricha, mały lestny Grab na pjatomaj, dokelž chcyše jemu kuzłarske huslički pokradnyć. Cyły dźeń bě Kito pućował. Popołdnju dóńdźe k hatam. Tam wołaše rybar za pomocu, dokelž běštej jeho dźowce wódneho muža do rybarskeho saka zawlekłoj. Kito jeho z huslenjom wuswobodźi a hižo měješe přećela po boku. Zhromadnje z rybarjom chcyše dale ćahnyć, tola nadobo běchu huslički preč. Wódny muž jemu přeradźi, zo je Graba při kradnjenju wobkedźbował. Tak podataj so rybar a Kito na Čornobóh, tam hdźež so Pan Dietrich wokoło honi, zo byštaj kuzłarske husle wróćo zdobyłoj.

Kito husličkar
  • Theater Bautzen
  • Theater Bautzen
  • Theater Bautzen
wjace čitać

Čmjeła Hana twari insektowy hotel

Čmjeła je wulka pomoc při wopróšenju zeleniny a sada. W Němskej znajemy 36 družinow čmjełow.
Wot toho su 16 wohroženych.

Kak móžemy čmjełam pomhać?

  • njewužiwaj w zahrodce žady jěd
  • hdyž rědšo trawu syćeš abo dźěl zahrody jaku dźiwju łuku wostjiš, ma čmjeła rjany žiwjenski rum
  • sadź wšelake rostliny, kotrež tež hišće w pózdnym lěću kćěja
    (na přikład kulojty wóst, lěćny bóz, mak, kopřiwy a cycawki, mlóč, dźećel, želbija, cyblink, lawendl …)
wjace čitać

Hra: ŠTÓ ABO ŠTO TO JE?

Rjenje a wažne za dźěći je, hdyž tež woni raz cyle w zmysle słowa móžnosć dóstanu, kontrolu přewzać. Wšako su tute dny wosebje za nich ćežke – tak cyle bjez přećelow. Na spočatku bě drje hišće rjenje, zo njetrjebaja do šule. Ale mjeztym so jim tola za tym styska, so raz swobodnje w druhich rumach pohibować směć, so we wosobinskim kontakće z dźěćimi samsneje staroby wuměnjeć a tež raz mocy měrić, w kolektiwje wuknyć a so zhromadnje z wučerjemi z tematiku wučby rozestajeć. Hdyž začuwamy hižo my starši, zo smy kontrolu nad našim wšědnym dnjom zhubili, kak drje čuja so potom dźěći?

wjace čitać

Hra za nowy fokus: Pantomima z dźěćimi

Pantomima – je to wuměłstwo, kotrež njeje nam hižo tak prezentne. Skerje znajemy ju hišće wot studentow, kotrež sej na promenadach wulkich městow z běłym mjezwočom a w čornych drastach někotre feńki přizasłuža.

Tradicija pantomimy saha wróćo hač do romskeje antiki a je so přez lětstotki na wšelake wašnje wuwiwała.
W 16. lětstotku, w času Commedia dell´arte, nasta nowa forma pantomimy, kotraž so po času w zapadnym swěće rozšěri. Tu drje so tež rěčeše, ale wužiwane maski a wosebje pohiby mějachu wulki wliw na wšitko, štož z toho wurosće. Na přikład nam znaty HARLEKIN ma w tutym času swoje korjenje.

„Hra za nowy fokus: Pantomima z dźěćimi“ weiterlesen →

Sonyłójak za dobre sony

„Soń, Hanka, soń, měsačk hižo přez štomy hlada…“ W raju sonow je wšitko móžne. Móžeš lećeć, spody wody dychać, ludźi zetkać, kiž daloko preč bydla, so do njeznatych swětow zanurić. Hanka wě, kak najlěpje do tutoho swěta sonow přińdźeš. Lehnješ so jednorje do łoža, začiniš woči a sej wusnješ… Ale někak so jej to před publikumom tak lochce njeradźi. Tež jeje najlubša melodija ju do raja spara njenjese. Jenož derje, zo znaje Hanka trik: wowcki ličić. A woprawdźe! Posledna wowcka wozmje ju sobu na jězbu: Stwa so wotewri a wona leći z mróčelemi, płuwa jako rybička hłuboko w morju a zwěri sej samo do swětnišća k hwězdam a měsačkej. Haj, w KOLEBAWCE je wšitko móžne. Ale wě Hanka tež, kak zaso wotućiš?

wjace čitać

Přiwšěm – Won! Won! so wuběhać!

Tež we wrótnych časach coronoweho wirusa je wšěm staršim jasne, zo dyrbja dźěći won, zo trjebaja pohib a čerstwy powětr. A budźmy sprawni – nic jenož wone! Starši, kotrymž to dźěłowy čas dowoli, njech sej na chwilku z dźěćimi do přirody wućeknu. Tu nikoho njenatyknješ a nasrěbaš so powětra, swěcy a nowych mocow. Tuchwilu wšak njeje móžno, na pućach a zahrodach ze susodźic dźěćimi hrać.

Dokelž njeje běhanje ze staršimaj runjewon najwjetše wjeselo za dźěći, předstajimy wam tu IMPULSY, z kotrymiž hodźa so dźěći derje k (dale)běhanju pohnuć. Tak njebudźe puć wostudły, ale wjesoły dyrdomdej.

wjace čitać

što tu namakaće?

Čas bjez šulskeje winowatosće, bjez pěstowarnje a bjez wulětow na hrajkanišćo, do kupjele abo kina je wužadanje za kóždu swójbu. My skićimy wam ideje najwšelakorišeho razu: hry za nutřka, wonka, pod blidom a we łožu. Prawje bórze namakaće tu lisćinu aktiwitow, kotrež hodźa so bjez wulkeho napinanja přesadźić.

Snano su waše dźěći hižo na kreatiwne ideje přišli? Potom pósćelće nam foto z małym tekstom! Wozjewimy to rady w rubrice Dźěći za dźěći!

Jeli maće přeća abo přispomnjenja, pósćelće nam hołbika přez kontaktowy formular.