Rjenje a wažne za dźěći je, hdyž tež woni raz cyle w zmysle słowa móžnosć dóstanu, kontrolu přewzać. Wšako su tute dny wosebje za nich ćežke – tak cyle bjez přećelow. Na spočatku bě drje hišće rjenje, zo njetrjebaja do šule. Ale mjeztym so jim tola za tym styska, so raz swobodnje w druhich rumach pohibować směć, so we wosobinskim kontakće z dźěćimi samsneje staroby wuměnjeć a tež raz mocy měrić, w kolektiwje wuknyć a so zhromadnje z wučerjemi z tematiku wučby rozestajeć. Hdyž začuwamy hižo my starši, zo smy kontrolu nad našim wšědnym dnjom zhubili, kak drje čuja so potom dźěći?
Slědowace ćělne zwučowanje dźiwadłoweje pedagogiki hodźi so jara derje, dźěćom raz składnosć dać, staršeju nawjedować. Što za to trjebamy? Jeničce čas.
PŘIHOTUJEMY SEJ małe cedlki. Na tute napisamy powołanja, pomjenowanja zwěrjatow, znate bajkowe postawy, DISNEY-figury abo tež zjawy přirody.
Hdyž smy znajmjeńša třo, rozdźělimy sej nadawki: Trěbne su MODEL, WUMĚŁC a PUBLIKUM
MODEL stupi so neutralnje na jewišćo. WUMĚŁC ćehnje kartu, na kotrejž steji na přikład słowo elefant. Jeho nadawk je, model bjez toho zo rěči tak sformować, zo publikum spóznaje, što ma předstajić – mjenujcy elefanta. Při tym sej přemysli:
ŠTO je charakteristiske za tute zwěrjo / tutu postawu / tute powołanje?
KAK dyrbju z modelom započinać, zo by jón do praweje pozicije přinjesł? Dyrbi MODEL snano klečeć, sedźeć abo ležeć?
KAK mam noze a ruce wužiwać? ŠTO maja pokazać?
Hdyž je WUMĚŁC hotowy, je PUBLIKUM na rjedźe. Wón ma wuhódać, što so předstaji. Po tym so nadawki měnja a hra so z nowej cedlku zaso započina.
Wažne je: Tu njesteji w srjedźišću, hač je něšto prawe abo wopačne. Njeje wažne, hač su wěcy derje spóznać abo hač ma sobuhrajer snano cyle hinaše předstawy. W srjedźišću steji poćah mjez wuměłcom a modelom. Wuměłc ma rozsudy tworić, model ma je akceptować. To žada sej skedźbnosć na jednej a dowěru na tamnej stronje. Jako starši móžemy tu w měrnej atmosferje móžnosć wužiwać, na hrajerske wašnje poćah skrućić abo jón po napjatym dnju zaso změrować a polěpšić. Nimo toho trenuja dźěći fantaziju a dobru kontrolu nad swójskim ćěłom.
dźiwaj so 