Wšudźe čitamy, kak mamy nětko najlěpje ze swojimi dźěćimi wobchadźeć, što mamy z nimi zhromadnje činić a što wostajić. Z njeličomnymi poskitkami chcedźa nam dobroćelske zwjazki, institucije, internetowe předewzaća a priwatni ludźo pomhać, naše dźěći jednorje a clewernje zaběrać. Dobre rady so jenož tak sypaja: kelko měli dźěsću tuchwilu dowolić, wo čo dźe, zo měli sej starši husćišo prajić moje ćěło je pěskowy nawěw a při tym hłuboko předychać. Tu dawaja pokiwy, tam samozrozumliwe žadanja.
Mnoho so z połnym prawom na dźěćo poćahuje. Dźěćo steji w srjedźišću. Wone ma so přez nas tak łahodnje kaž móžno a bjez škody přez krizu žonglěrować.
Zdobom – to wšitcy wěmy – steji žadanje na staršich: Dźěłajće! Tež hdyž maja mnozy móžnosć nadhodźiny wottwarić, sej minus-hodźiny nahromadźić, dowol brać atd. zwostanje hustodosć fakt: štóž chce pjenjezy zasłužić, dyrbi dźěłać. Někak chcemy wšak swoje dźěło wukonjeć, wšako wone nas tež wuruna. Smy tež dobri w tym, štož na dźěle zdokonjamy. Smy wšak sej dźěło snano tež sami wupytali. Wonkowny a nutřkowny narok žadatej husto: Dźěłaj! Zakónč tutón nadawk nětko skónčnje, prjedy hač će zaso něchtó přetorhnje.
Kaž připódla zda so ći snano tež partnerstwo. Poprawom žada sej iniciatiwu a emocionalnu inwesticiju. To so w diskusiji husto zady dele kuli. Kak da tež z tym hišće wobchadźeć? Sam maš snano druhdy začuće, zo w krizy wjele wjace do dźěći inwestuješ hač do partnera/partnerki.
Njewurunanosć w partnerstwje móže frustrěrować. Njedosahace dźěłanje za sebje a/abo za dźěłodawarja móže frustrěrowace być a prawy stres wuskutkować. Dyrbiš tola swójbu zežiwić a njesměš swoje dźěłowe městno wohrozyć. Ideje za dobru naladu zdźeržacu a zmysłapołnu zaběru za lube dźěći ći pomału wuńdu. Šulske dźěći nimaja woprawdźe hižo lóšt na domjace nadawki – a starši nimaja lóšt, je zaso a zaso motiwować. Dźěćom je łastojčka podlećała a njejsu hižo ći najwurunaniši daloko a šěroko.
Haj, wone smě tež jónu WŠITKO KAŁ być. Směš tež jónu prawje špatnu naladu měć.
Pokaž ju. Wupowědaj so. Zawěsć, zo partner a dźěći wědźa, kak so ći wjedźe. Potom dadźa ći snano wot samo měr. Wzmi so won z tuteje dračiny. Za to dyrbi w datym padźe partner/ka hłownu zamołwitosć přewzać a so na dlěše wuchodźowanje z dźěćimi podać. Abo hinak wokoło – sam so zminješ na dlěše wuchodźowanje.
Wažne je, zo móžeš jónu swój wentil wočinić. Joggować, čitać na čerstwym powětře, rjejić w lěsu, płakać na konopeju, GilmoreGirls abo Starwars w telewiziji. Wšitko je lěpje, hač swój frust na swójskim dźěsću abo druhim sobučłowjeku wupušćić. Frust dyrbi won a preč. Njesmě so w bydlenju zapopadnyć. Spytaj tajki abo podobny puć namakać. To njeje lochko – ale je móžno a jara pomocliwe za wšitkich.
Pytnješ-li zo frustraciski potencial pola partnera/partnerki stupa, daj přesłapjenosći rum. Signalizuj jemu/jej, zo je w porjadku, hdyž je „powětr jónu won“. Přewzaj wodźidło a zhub so z dźěćimi chwilu do parka, na zahrodu abo do lěsa. To móže wjele wuskutkować a frustrěrowanej „lěpšej połojcy“ rum k dychanju a rehabilitaciji spožčić. Jako přichodny/-a sy potom ty zaso na rjedźe …
dźiwaj so 