Poprawom klinči wšitko jara jednorje. Tola husto mamy my dorosćeni ćeže, to swoje přinošować. Haj, něštožkuli traje pola dźěći dlěje, wšako nimaja hišće we wšěm samsnu rutinu kaž my a druhdy činja snano tež něšto „wopak“. Poradźi-li pak so nam naš narok spušćić, zo ma so wšitko prawje spěšnje a efektiwnje zrjadować, změjemy bórze małych pomocnikow w domjacnosći, kotrež nas z wjeselom podpěruja. Dźěći wobkedźbuja dokładnje – woni widźa stonacych staršich, kotřiž dyrbja HIŽO ZASO tutu HŁUPU KUPJEL rjedźić. Abo woni hrajkajo pomhaja a dóstanu dobre začuće za wěc. Jónu bóle, jónu mjenje – spytajće to cyle jednorje přeco zaso.
- Hdyž chceće kóždy nowy dźeń zhromadnje započinać, je derje, hdyž tež kóždy dźeń z wašimi dźěćimi zhromadnje zakónčiće. Wotrumujće zhromadnje blido, tak pomhaja wam dźěći. Zrumujće tež w teamje wšitke hrajkanske kupy w bydlenju, tak pomhaja ći wulcy tym małym. A přichodny dźeń so lěpje započina, dokelž je wšitko zaso na nulu stajene.
- Dźiće z dźěćimi najlěpje hižo do snědanje joggować – małe dźěći hodźa so w buggyju abo manduce sobu wzać. Jeli to móžno njeje, dźiće na zahrodu abo na dwór a čińće z dźěćimi rańšu gymnastiku na čerstwym powětře. Tak maja wone swoju prěnju sportowu hodźinu hižo za sobu. Wšitcy čuja so derje a maja dobru naladu.
- Jeli maće wjacore šulske dźěći, měła so šula – kaž zwučene – po snědani započinać. Dajće dźěćom swoje nadawki spjelnić. Budźće w bliskosći a zrjadujće paralelnje swójske telefonaty, pisajće nakupowanske lisćiny, nowy jědźny plan a spjelńće dźěl wašich běrowowych dźěłow. Při tym móžeće prašenja dźěći wotmołwjeć. Wobhladujće tutón čas jako zhromadny běrowowy čas a pomjenujće jón z wašimi dźěćimi tež tak.
- Popřejće wašim dźěćom jónu wob dźeń wusyłanje w telewiziji, přez livestream abo z mediateki. – Wusyłanje, kotrež je zmysłapołne a po móžnosći powučne.
- Spytajće hižo při warjenju kuchnju zaso zrumować. Tak lutujeće čas, kotryž móžeće za dźěło w připołdnišej přestawce lěpje wužiwać.
- Sće-li sej předewzali kupjel rjedźić, stłóčće małym dźěćom włóžnu lapku do ruki. Budźeće so dźiwać, kak napjate je runje za małe dźěći, staršim w domjacnosći pomhać. Dowěrće jim! To traje dlěje, ale hdyž steji zhromadna činitosć w srjedźišću, dobudu wšitcy: zhromadny wuspěch, zhromadny čas a cyle připódla wuknjenski efekt – rjedźenje móže wjeselo činić. Na kóncu smědźa ći mali z prawom twjerdźić, zo su kupjel nimale cyle sami wurjedźili. Haj, papa je kusk pomhał. Zhromadnje čini tak a tak wšitko wjele wjace wjesela. A něšto k smjeću dawa při tym přeco!
- Nima-li wšitko we wopłokowanskej mašinje rum, zwopłokujće zbytk najlěpje hnydom z ruku a zapřijeće tež tu dźěći. To njebudźe wostudłe a kuchnja je za přichodny dźeń hotowa.
Štóž chce sej domjacne dźěło derje planować, móže sej tutón rjany přehlad (z njedźelnišeho přinoška) rady jako download wućišćeć!
dźiwaj so 
